Осигурувањето не е луксуз ниту трошок, осигурувањето е потреба која обезбедува финансиска сигурност и материјална благосостојба за вас и за вашите најмили. 

 Главна цел на студиската програма од областа на осигурување е да им овозможи на студентите да се стекнат со продлабочени знаења од областа на менаџментот во осигурување и со специфични вештини за примена на ова знаење во практиката. За остварување на овие цели студиската програма ги обработува теоретските аспекти на оваа област, фокусирајќи се и на нивната практична примена.

 Република Северна Македонија, како земја во развој, бележи континуиран раст и зголемување на значајноста на осигурителниот во финансискиот сектор на државата. Со постепениот развој на финансискиот сектор се намалува неговата традиционална банкоцентричност, при што осигурителните друштва доаѓаат до особен израз. Тоа создава потреба од студиска програма за втор циклус студии од областа на менаџмент во осигурување, која ќе понуди соодветни знаења, способности и вештини од овие области во рамките на организациските науки и управувањето. Паралелно се јавува и потреба за научно-стручна и независна анализа и евалуација на спроведените политики и реформи во осигурувањето, со цел предлагање мерки за нивно поефикасно и поефективно спроведување. Финансиската криза покажа дека осигурителниот сектор не е имун на турбуленции, па неговото внимателно менаџирање и супервизија се појавува како клучно прашање. Растечката финансиска интеграција во економиите нужно го наметнува прашањето на реформи, солвентност и управување со ризиците, за што студиумот нуди адекватен одговор.

 Студиумот по Менаџмент во осигурување е внимателно структуриран и дизајниран да одговори на образовните и реалните проблеми во областа на осигурувањето и менаџирањето на осигурителните друштва. Тој е адекватен за сите кандидати кои имаат за интерес да се ангажираат и унапредуваат како дел од врвниот менаџмент на осигурителните компании, вработени во осигурителни компании или пак како осигурителни брокери. Дополнително, студиската програма по Менаџмент во осигурување отвара можности за профилирање на кандидатите во доменот на животното и неживотното осигурување, актуарството, управувањето со ризиците во осигурителните компании, финансиска анализа и процена, управување со општото и посебното окружување кај осигурителните друштва, креирање и имплементација на стратегии и стратешки приоритети, корпоративното управување, бизнис етиката, бизнис аналитиката и електронските бизнис модели кои се применуваат во осигурителната дејност. Специфичните задачи на студиската програма се: оспособување на менаџерите за донесување на одлуки во осигурителната индустрија; креирање на лидерство, интегритет и ефикасни аналитички способности на менаџерите за управување со ризикот и апликација на механизмот на осигурување во превземање и трансфер на ризикот; зголемување на капацитетот на менаџерите во осигурителната индустрија, како и во друштвата за пензиско осигурување, системот за здравствено осигурување и институциите на пазарот на осигурување во носењето на конкурентни и одржливи одлуки, преку анализа на напредните елементи на интерното и екстерното окружување во осигурителната индустрија, финансисиот систем на национално и меѓународно ниво; и креирање на холистичка рамка на напредни знаења и способности во функција на мултитаскинг и мултидисциплинарен пристап во решавање на проблемите и предизвиците.

 Предметните програми на оваа студиска програма се во линија со динамичната бизнис клима и предизвиците и можностите кои ги нуди осигурувањето. Посебен акцент е ставен на развивањето и унапредувањето на способностите за тимска работа, на аналитичката способност, на способноста за донесување одлуки, способноста за лидерство и комуникација, но воедно и за независна идентификација на своите лични потреби, интереси и професионален развој.

 Целината од знаење која ја нуди студиската програма по Менаџмент во осигурување ќе ги подготви студентите за успешна кариера и ќе им овозможи да се ангажираат во осигурителните друштва како:  

• Главни извршни и оперативни менаџери
• Неизвршни менаџери во Одборите на директори
• Секторски и регионални менаџери
• Менаџери на друштва за застапување и осигурително брокерски друштва
• Менаџери на линиско ниво на менаџмент
• Стратегиски и бизнис аналитичари и планери
• Застапници и брокери во продажната мрежа
• Вработени во супервизорско-регулаторни институции
• Менаџери и агенти во системот на капитално-финансирано пензиско осигурување
• Стручен кадар, советници и соработници на неменаџерски позиции

 По комплетирање на програмата магистрираните студенти се стекнуваат со бројни предности од типот на поголеми можности за вработување, флексибилност и слобода во избор на работно место, брз развој во кариерата, подобро платени позиции на кои се бараат експерти со широки познавања од областа на менаџментот во осигурувањето.

Менаџмент во осигурување – наставна програма 2022/23 – Економски факултет – Скопје (ukim.edu.mk)

На 8-ми април, Факултетот за економски и административни науки при Меѓународниот Балкански Универзитет (МБУ) заедно со Групацијата на осигурувањето при Стопанската комора на Северна Македонија ја организираа првата интерактивна едукативна презентација на тема „Дознајте како осигурувањето нè штити денес и нè обезбедува утре“ за студентите на Меѓународниот Балкански универзитет.

Настанот беше организиран со цел да се зголеми знаењето и свеста за осигурувањето, како и да се промовира финансиската писменост и финансиската вклученост на различни социјални групи, со цел подобро познавање на осигурителниот пазар, управувањето со ризик, подобро разбирање на осигурителните производи и услуги, обезбедување зголемена заштита на осигурениците, како и презентирање на осигурувањето како интересна работна професија за младите. 
Осигурителните друштва членки на Групацијата веруваат дека придобивките од финансиската едукација се взаемни за економијата, поединецот, домаќинствата и општеството во целина. Оттука, финансиски образованото население подобро го разбира финансискиот пазар и производите, стекнува способност да ги искористи предностите на финансиските производи и подобро да се заштити од финансиски ризици. Од друга страна, подобрата финансиска писменост и свесност на населението придонесува за поголема финансиска вклученост.

Студентите имаа привилегија да стекнаат знаења и да дискутираат за осигурувањето во Македонија од докажани и признати професионалци од осигурителната индустрија со долгогодишно практично искуство и знаење. Имено, на настанот се обратија претставници од четири престижни осигурителни компании, членки на Групацијата на осигурување при Стопанската комора на Северна Македонија:

– Г-дин Климе Попоски, претседател на Управниот одбор и генерален директор на Winner Insurance, Vienna Insurance Group, Скопје
– Г-дин Ило Ристовски, претседател на Управен одбор и генерален директор на Халк осигурување АД Скопје
– Г-дин Горан Божиновски, менаџер на Академијата во Кроација осигурување – Живот АД Скопје
– Славко Саздовски, директор на Одделот за човечки ресурси и академија во Триглав Осигурување-Живот АД Скопје, како и 
– г-ѓа Антонета Манова Ставреска, проектен менаџер и задолжена за Здружението на финансиските организации при Стопанската комора на Северна Македонија.

Последно, но не и најмалку важно, проректорите доц. д-р Мевлудин Ибиш, доц. д-р Сејхан Муртезан Ибрахими, декан на Факултетот за економски и административни науки доц. д-р Лиза Алили Сулејмани и доц. Проф. д-р Елена Парнарџиева Станоевска имаа шанса да разменат мислења за можностите за понатамошна соработка помеѓу Стопанската комора и Меѓународниот балкански универзитет (МБУ).

Извор:mchamber

Добрата плата веќе не е доволен услов за да ги привлечете и задржите најдобрите таленти. За да останете атрактивни на пазарот на трудот мора да обрнете внимание и на бенефициската програма.

Повеќето луѓе кои бараат работа ќе кажат дека парите се најважниот фактор при изборот на работа. Тоа е така бидејќи никој не сака да работи нешто за кое е недоволно платен знаејќи дека останатите компании нудат многу подобри услови.

Но, ако премногу се фокусираат на износот, кандидатите може да ги занемарат и другите придобивки од работата, а тоа се бенефитите.

Првото нешто што кандидатите го забележуваат кога ќе го видат вашиот оглас е, секако, платата. Меѓутоа, кога ќе ја прифатат работата кандидатите сфаќаат дека добрите бенефити вредат многу повеќе од износот кој го добиваат секој месец на својата банкарска сметка.

И токму тие се тоа што ги држи вработените мотивирани, ангажирани и задоволни на долг рок.

Точно е дека бенефитите не можат да го нахранат нивното семејство, но затоа можат да го подобрат квалитетот на живот. Приватното здравствено осигурување им дава сигурност во најразлични животни ситуации.

Секој сака да заработува повеќе пари, но размислете добро зошто ни е потребен плус доход на онаа плата што веќе ја заработуваме.

Зошто го посакувате или ви е потребен тој дополнителен приход? За да им обезбедите подобро образование на вашите деца, да си овозможите брзо и квалитетно лекување кога најмногу ви е потребно,да патувате на море… листата е долга.

Кога би работеле во компанија со добра бенефициска програма, бенефитите би можеле да ви заштедат пари што во теорија е исто како да ви ја покачиле платата.

Здравствено осигурување е одличен бенефит кои секој вработен посакува да го има за него но и за неговото семејство.

Во време кога нашето лично здравје е доведено во прашање, приватното здравствено осигурување како бенефит што го добиваат вашите вработените не само што ќе придонесе  задоволство кај вашите вработени туку тоа и ќе резултира со висаока продуктивност во вашата компанија.Приватното здравствено може и да промени многу работи во вашата стратегија за привлекување на врвни кандидати.

За да привлечете одлични кандидати, потребно е да понудите одлични услови, а овој бенефит дефинитивно ќе ви помогне во тоа.

Нудењето приватно здравствено осигурвање на вработените покажува дека се грижите за целокупната благосостојба на вашиот тим.

Важно: Кога купувате полиса за осигурување на имот задолжително побарајте друштвото за осигурување да ви ги даде Условите за осигурување кои се применуваат за осигурување на имот. Внимателно прочитајте ги!

Со осигурување на имот добивате обесштетување во случај на настанување на штета на вашиот имот. Обесштетувањето неможе да биде поголемо од штетата која осигуреникот ја претрпел. 

Кај осигурувањето на посеви и плодови, обесштетувањето се утврдува согласно вредноста што би ја имале посевите и плодовите во времето на собирањето.

Напомена: При утврдување на обесштетувањето се зема предвид и пропуштената добивка но под услов ако тоа е договорено.

Ако во текот на ист период на осигурувањето настанат повеќе штети еден по друг, обесштетувањето за секоја од нив се определува и исплатува во целост со оглед на сумата на осигурување, без нејзино намалување за износот на порано исплатените штети во тој период.

Осигурителни поими: 

–              Осигурувач – е друштво за осигурување 

–              Договарач на осигурување е лице што со друштвото за осигурување склучува договор за осигурување (полиса) 

–              Премија на осигурување е износ што договарачот на осигурување го плаќа врз основа на  склучениот дговор

–              Сума на осигурување е износ на кој имотот е осигурен

–              Лист на покритие е потврда што привремено ја заменува полисата

–              Полиса е документ со кој се потврдува постоење на договорот за осигурување